حادث كريم الهواري

كريم الهواري ابن صاحب سلسلة "هايبر وان" 

اللي خبط ٤ طلاب وهما داخل عربيتهم موتهم بسبب سرعته الجنونية الطب الشرعي أثبت انه كان شارب كحول ومواد مخدرة ، المحاميين بتوعه قرروا ينتحلوا شخصيات قضائية من النيابة العامة عشان يروحوا مكان الواقعة ويتلفوا الكاميرات اللي سجلت ورصدت الحادث ، المهم بقي إن مالك الفيلا اللي بها الكاميرات ( ويقال انها سيدة) بلغت عنهم لما حست بحاجه غلط .

تخيل إنت كمحامي تطلب مثلا ١٠ مليون ولا اي رقم في الحياة الدنيا اللي احنا فيها دي عشان تروح بنفسك تنتحل شخصية قضائية عشان انت قررت تبوظ القضية وقررت تضيع حق ٤ أطفال عربيتهم اتفرمت بالمعني الحرفي وملحقهومش اسعاف ولا مستشفي وحتي لما وصلوا المستشفي كانوا طبعا ماتوا الأربعة . 

فرق كبير قوي بين الست اللي بلغت عشان تجيب حق الولاد وبين محاميين كلاب قرروا يروحوا يتلفوا الاثبات الوحيد اللي ممكن يبرد نار أهاليهم علي الاقل ولو ١% .

افتكرت جملة كده لمصطفي ابراهيم كان بيقول فيها الاخطبوط الرأس مالي اتساب علي الناس اللي ملهاش حظ ، علي الناس اللي ملهاش فرص .

إن شاء الله حق الأطفال دول ييجي لان الشخص اللي تسبب في مقتلهم بسبب تهوره ورعونته وسكره وتسبب في حرقة قلب كل الاسر دي لازم ياخد أشد عقاب